Rev 5 | DOB | STEP | 'Enega tauna 'ebemi esaesa nina 'ena 'imiyatowa ya'itena, ta nima 'atainega pwepwai sinunumina nadigega gimibuki 'igiyaina, ta 'eto'etoladina solanega ta gwaunega, ta wate pwepwai nina 'ana losipwa 'ana yau sebeni.

Revelation of John 5

Buki 'ana 'ita 'atuwa pwepwai sinunumina

1 'Enega tauna 'ebemi esaesa nina 'ena 'imiyatowa ya'itena, ta nima 'atainega pwepwai sinunumina nadigega gimibuki 'igiyaina, ta 'eto'etoladina solanega ta gwaunega, ta wate pwepwai nina 'ana losipwa 'ana yau sebeni. 2 Ta wate 'ebweu anilose waiwaina ya'itena, ta 'enana sinabwanega 'ibwaubwau, 'igwae, “Yaita sawesawenaya be losipwa nidi 'ida li'amidi be pwepwai 'ineyasi?”

3 Ta ona'ai'aila, nigeya 'ebweu yaita 'ilobaloba galewaya nai bale'uya nai bale'u 'ubuninaya 'aene tauna sawesawenaya be losipwa nidi 'ili'amidi be buki nina solana 'ida 'ita. 4 Ga yanuwamwau 'ai'aila ga yadedoi, manuna nigeya 'ebweu yaita silobaloba 'ana lobwene be buki nina 'igigege be solana 'ida 'ita.

5 'Enega 'inapwanao nidi 'ediyega 'ebweuna 'eguya 'igwae, “Geya'abo 'udeedoi, manuna laiyoni nina Yudia 'enega, tauna Debida 'ina susuyega ni'atu 'iewaiwai, ga tauna sawesawenaya be losipwa sebeni nidi 'ili'amidi be pwepwai nina 'ida neyasi.”

6 Ta wate 'ebemi esaesa nina selabenaya 'ebweu lami ya'itena, yobai ata gamwagamwanidiya 'itootoolo ta 'inapwanao wate gamwagamwanidiya, ta lami nina 'ana 'ita 'atuwa tauna siloemwawasina, ta kunanao sebeni ta matanao wate sebeni, taudi matanao nidi nate Yaubada yaluyaluwanao taudi 'ietunedi bale'u maibo'ana 'enaya. 7 Ga lami nina 'inao ga pwepwai nina 'i'ewena tauna 'ebemi esaesa 'ena 'imiyami nima 'atainega.

8 'Enega ni'atu pwepwai nina 'i'ewena, ga yobai nidi be wate 'inapwanao nidi lami nina 'enaya sibe'u sanamwa'uta ga 'ena sibwagobwago, ta 'ebweuna 'ebweuna 'ediya ma idi 'ebe gwanegwane siguiguinuwa, ta wate ma idi gaeba goula ta bobo'adi, ga gala'u maina bobo'ana gaeba nidi soladiya sigabuna, ta 'ana mwalatoi nate Yaubada 'ina tomotaiyao 'idi sidasida situ'etu'e 'enaya.

9 Ga wali auwauna siwaliyena, sigwae:

“Ona 'ai'aila, 'oyo sawesawemuya be buki nate 'u'ewa, ta wate sawesawemuya 'ana losipwa 'uli'ami, manuna ni'atu siloemwawasimu, ga lalamuyega tomota 'usa'ugagidi Yaubada manuna, ta taudi bodao be 'enanao be susuyao be 'ebeloinao maibo'adi 'ediyega. 10 Manuna 'oyo

'uesinuwedi be 'aene 'imu 'ebeloina solanaya sida etotaliya Yaubada manuna, be wate bale'uya sida etoloina.”

11 Ta wate aniloseyao yau wawasae ya'itedi, nigeya aisawa, 'ebemi esaesa nina be yobai nidi ta wate 'inapwanao nidi sitoolo sakowasiyedi, 12 ta wate 'enadi sinabwana yanonona sigwaegwae,

“Tauna lami nina siloemwawasina, sawesawenaya be loina be esaesa be mwalatoi be waiwai be 'amayaba be tupu ta wate 'awabobo'ana 'ida lobadi.”

13 Ta wate mwelumweluluwao 'ebweuna 'ebweuna galewaya be bale'uya be bale'u 'ubuninaya be olaya, ta wate mwelumweluluwao sena maibo'adi 'ediyega, yanonodi siwaliwali, sigwaegwae:

“Tauna 'ebemi esaesa 'ena 'imiyatowa, be wate lami nina 'ediya, tada tuputupu be tada 'amayabedi be ta'awa 'ese'esedi, ta wate ta'awa toewaiwaiyedi, tuta maibo'ana 'ediya.”

14 'Enega yobai nidi site ata sigwae, “Nadigega,” ta wate 'inapwanao nidi sibe'u sanamwa'uta, ga sibwagobwago.